ලොව පුරා ජනප්‍රිය ChatGPT AI චැට්බොට් එක, එහි වෙබ් සෙවුම් හැකියාව යාවත්කාලීන කරමින්, සාප්පු යෑම තවත් පහසු කරන නව විශේෂාංග රැසක් හඳුන්වාදී තිබෙනවා. මේ විශේෂාංග සියලුම පරිශීලකයින්ට—නොමිලේ, Plus, Pro, සහ ලොග් වී නැති පරිශීලකයින්ටත්—ලබාදී තිබෙන අතර, දැන් ඔබට ChatGPT හරහා නිෂ්පාදන සොයාගැනීම, සංසන්දනය කිරීම සහ මිලදී ගැනීම ලේසි කරන ඩිජිටල් සාප්පු අත්දැකීමක් ලබාගන්න පුළුවන්.
Online Shopping කිරීමේ නව අත්දැකීමක්
ChatGPT හි නව සාප්පු විශේෂාංග ඔබේ ඔන්ලයින් සාප්පු යෑමේ අත්දැකීම වඩාත් පහසු සහ තොරතුරු සපිරි කරනවා. දැන් ඔබ නිෂ්පාදනයක් ගැන සෙවුමක් කළ විට, ChatGPT විසින් විස්තරාත්මක නිෂ්පාදන කාඩ්පත්, රූප, මිල තොරතුරු, සහ ගනුදෙනුකරුවන්ගේ සමාලෝචන ඉදිරිපත් කරනවා. ඒ විතරක් නෙමෙයි, ඔබට එම නිෂ්පාදනය මිලදී ගැනීමට සෘජු ලින්ක් එකක් හරහා වෙළෙන්දාගේ වෙබ් අඩවියට යන්නත් පුළුවන්. නිෂ්පාදන කාඩ්පතක් ක්ලික් කළ විට, Google Shopping වගේම, විස්තර බලන්න පුළුවන් Sidebar එකක් එනවා. OpenAI පවසනවා මේ නිෂ්පාදන යෝජනා “ස්වාධීනව” තෝරාගන්නා බවත්, ඒවා තවමත් වෙළඳ දැන්වීම් හෝ අනුග්‍රාහක නිෂ්පාදන නොවන බවත්.
දැන්වීම් රහිත, ඒත් අනාගතයේදී?
OpenAI විසින් මේ විශේෂාංග හඳුන්වාදී ඇත්තේ දැන්වීම් හෝ අනුග්‍රාහක යෝජනා රහිතවයි. ඒත්, ඔවුන් බාහිර පාර්ශවකරුවන් එක්ක එකතු වෙලා මිල තොරතුරු තවත් නිවැරදි කරන්න වැඩ කරනවා. පසුගිය වසරේ OpenAI හි මූල්‍ය ප්‍රධානියා Financial Times වෙත පවසා තිබුණේ, දැන්වීම් මත පදනම් වූ ව්‍යාපාරික ආකෘතියක් ගැන සලකන බවයි. ඒත්, එය “විචක්ෂණශීලී” ලෙස කළ යුතු බවත්, ඒ ගැන තවමත් සක්‍රීය සැලසුම් නැති බවත් පසුව පැවසුවා. ඒ නිසා, ChatGPT හි සාප්පු යෑමේ අත්දැකීම දැනට දැන්වීම් රහිතව තිබුණත්, අනාගතයේදී එවැනි යෝජනා එකතු වෙන්න පුළුවන්.
WhatsApp හරහාත් සෙවුම් හැකියාව
ChatGPT හි සෙවුම් හැකියාව දැන් WhatsApp හරහාත් ලබාගන්න පුළුවන්. 1-800-242-8478 (+1-800-ChatGPT) යන අංකයට මැසේජ් කරලා, ChatGPT එක්ක චැට් කරමින් වෙබ් සෙවුම් කරන්න හැකියාව ලැබිල තියෙනවා. මේක WhatsApp හරහා ChatGPT භාවිතයේ නව පිම්මක් විදිහට සැලකෙනවා.
තවත් යාවත්කාලීන රැසක්
සාප්පු යෑමේ විශේෂාංගවලට අමතරව, ChatGPT හි සෙවුම් හැකියාව තවත් වැඩිදියුණු කර තිබෙනවා. දැන් ඔබ සෙවුමක් ආරම්භ කරන විට, Google Search හි autocomplete වගේ, ජනප්‍රිය සෙවුම් (trending searches) සහ යෝජිත සෙවුම් (autocomplete suggestions) පෙන්වනවා. ඒ වගේම, සෙවුම් ප්‍රතිඵලවල උපුටා දැක්වීම් (citations) වැඩිදියුණු කරල තියෙනවා. දැන් එකම පිළිතුරක බහුවිධ උපුටා දැක්වීම් ලැබෙන අතර, ලින්ක් එකකට මූසිකය ගෙනයන විට එය පිළිතුරේ කුමන කොටසකට සම්බන්ධද කියල බලන්න පුළුවන්. මේ යාවත්කාලීනත් එක්ක, ChatGPT ඔන්ලයින් තොරතුරු සෙවීම තවත් ලේසි කරනවා.
Source: www.bloomberg.com www.wired.com
