ගෝලීය තාක්ෂණික ක්ෂේත්රය වර්තමානයේ මුහුණ දී සිටින දැවැන්තම අභියෝගය වන Memory Chips හිඟය, ජංගම දුරකථන සහ පරිගණක සීමාවන් ඉක්මවා ගොස් ඇති බව වාර්තා වේ. ලොව ප්රමුඛතම තාක්ෂණික නිෂ්පාදන සමාගමක් වන Samsung සමාගමේ සම-ප්රධාන විධායක නිලධාරී TM Roh මහතා මෑතකදී කළ ප්රකාශයකට අනුව, මෙම හිඟය ඉදිරියේදී Smart TVs සහ අනෙකුත් ගෘහ විදුලි උපකරණ සඳහා ද දැඩි ලෙස බලපානු ඇත.
මෙම තත්ත්වය හුදෙක් නිෂ්පාදන ප්රමාණය සීමා වීමට පමණක් නොව, වෙළඳපොළේ දැනට පවතින විද්යුත් උපකරණවල මිල ගණන් සීඝ්රයෙන් ඉහළ යාමට ද ප්රධාන හේතුවක් වනු ඇතැයි ආර්ථික විශ්ලේෂකයෝ පෙන්වා දෙති.
TM Roh මහතා පෙන්වා දෙන්නේ වර්තමානයේ පවතින මෙම හිඟය පෙර නොවූ විරූ මට්ටමකට වර්ධනය වී ඇති බවයි. මේ පවතින වාතාවරණය හමුවේ ලොව කිසිදු සමාගමකට මෙහි බලපෑමෙන් මිදී සිටීමට හැකියාවක් නොමැති බව ඔහු අවධාරණය කළේය. මීට පෙර මෙම හිඟය ප්රධාන වශයෙන් බලපෑවේ Smartphone සහ Laptop වැනි උපාංගවලට වුවත්, දැන් එය ශීතකරණ, රෙදි සෝදන යන්ත්ර සහ Smart TV නිෂ්පාදන දාමයට ද තර්ජනයක් වී ඇත.
ලොව ප්රමුඛ රූපවාහිනී නිෂ්පාදක සමාගමක් ලෙස Samsung සමාගම මෙම අර්බුදය සමනය කර ගැනීමට විවිධ උපායමාර්ගික පියවර ගනිමින් සිටියද, පාරිභෝගික භාණ්ඩවල මිල ඉහළ යාම වැළැක්විය නොහැකි තත්ත්වයක් බව ඔහු වැඩිදුරටත් සඳහන් කළේය.
DRAM මිල ගණන් 50% කින් ඉහළට?
වෙළඳපොළ දත්ත වාර්තා පෙන්වා දෙන්නේ 2026 වසරේ පළමු කාර්තුව (Q1 2026) වන විට DRAM (Dynamic Random Access Memory) සඳහා වන ගිවිසුම්ගත මිල ගණන් 50% කට වඩා වැඩි ප්රමාණයකින් ඉහළ යනු ඇති බවයි. මේ හේතුව නිසා Samsung සහ SK hynix වැනි ලොව ප්රමුඛතම Chip සැපයුම්කරුවන්, දිගුකාලීන සැපයුම් ගිවිසුම් සඳහා අත්සන් තැබීමට මැලිකමක් දක්වයි. ඒ වෙනුවට ඔවුන් කෙටි කාලීන ගිවිසුම් හරහා වෙළඳපොළ මිල වෙනස්වීම්වලට අනුකූල වීමට උත්සාහ කරමින් සිටී.
මෙම තත්ත්වය නිෂ්පාදන පිරිවැය ඉහළ නැංවීමට සෘජුවම දායක වන අතර, අවසාන ප්රතිඵලය ලෙස පාරිභෝගිකයාට වැඩි මිලක් ගෙවීමට සිදුවීම වැළැක්විය නොහැක.
AI සහ පාරිභෝගිකයා අතර ගැටුම
මෙම හිඟයට ප්රධානතම හේතුවක් වී ඇත්තේ වර්තමානයේ ලොව පුරා පවතින AI තාක්ෂණයේ දැවැන්ත වර්ධනයයි. ලොව ප්රධාන පෙළේ සමාගම් තම Data Centers සහ AI යටිතල පහසුකම් දියුණු කිරීම සඳහා අතිවිශාල වශයෙන් මතක චිප ඇණවුම් කරමින් සිටී.
Samsung සහ SK hynix වැනි නිෂ්පාදකයින් තම නිෂ්පාදන ධාරිතාව උපරිම මට්ටමින් පවත්වා ගැනීමට උත්සාහ කළද, නිපදවන සෑම නව චිපයක්ම පාහේ AI අංශය වෙත වෙන් කිරීමට සිදුව ඇත. මේ හේතුවෙන් සාමාන්ය පාරිභෝගික ඉලෙක්ට්රොනික උපකරණ සඳහා අවශ්ය වන සැපයුම අඩාල වී තිබේ. තාක්ෂණික ක්ෂේත්රයේ ප්රවීණයන් පවසන පරිදි, AI ක්ෂේත්රයේ පවතින මෙම අධික ඉල්ලුම පවතින තාක්කල්, සාමාන්ය පාරිභෝගිකයාට චිප හිඟය නිසා ඇතිවන පීඩනයට මුහුණ දීමට සිදු වනු ඇත.
මෙම අර්බුදය 2027 දක්වා දික් ඇදෙයිද?
වත්මන් පුරෝකථනයන්ට අනුව, මෙම මතක චිප හිඟය 2027 වසර දක්වා හෝ ඊටත් එහාට පවතිනු ඇතැයි අපේක්ෂා කෙරේ. සෑම කාර්තුවකම DRAM සඳහා පවතින ඉල්ලුම වර්ධනය වීමත්, නිෂ්පාදන ධාරිතාව වැඩි කිරීම සඳහා වසර කිහිපයක් ගතවීමත් මීට හේතුවයි.
Samsung සමාගම පවසන්නේ තමන් සිය හවුල්කාර සමාගම් සමඟ එක්ව මෙම බලපෑම අවම කර ගැනීමට දිගුකාලීන සැලසුම් සකස් කරන බවයි. කෙසේ වෙතත්, අමුද්රව්ය මිල ඉහළ යාම හමුවේ Smart TV සහ අනෙකුත් Smart උපකරණවල මිල ස්ථාවරව තබා ගැනීම අසීරු කාර්යයක් වනු ඇත.
පාරිභෝගිකයන් දැනුවත් විය යුතු කරුණු
නිෂ්පාදන අංශයේ සිදුවන මෙම වෙනස්කම් හමුවේ පාරිභෝගිකයන්ට කරුණු කිහිපයක් කෙරෙහි අවධානය යොමු කිරීමට සිදුවේ. එනම්,
- මිල ඉහළ යාම - ඉදිරි මාස කිහිපය තුළ Smart TV, ශීතකරණ සහ රෙදි සෝදන යන්ත්රවල මිල ගණන්වල කැපී පෙනෙන වෙනසක් බලාපොරොත්තු විය හැක.
- සැපයුම් ප්රමාදය - ඇතැම් මාදිලි වෙළඳපොළේ හිඟ වීමට හෝ ඇණවුම් කළ පසු ලැබීමට ගතවන කාලය වැඩි වීමට ඉඩ ඇත.
- තාක්ෂණික සංවර්ධනය - චිප හිඟය නිසා ඇතැම් නව විශේෂාංග සහිත උපකරණ වෙළඳපොළට හඳුන්වා දීම ප්රමාද වීමේ හැකියාවක් පවතී.
Samsung සමාගමේ Semiconductor නිෂ්පාදන අංශයට මෙම මිල ඉහළ යාම ලාභදායී විය හැකි වුවද, සමස්තයක් ලෙස පාරිභෝගික භාණ්ඩ අංශය දැඩි අභියෝගයකට මුහුණ දී සිටින බව TM Roh මහතාගේ ප්රකාශයෙන් පැහැදිලි වේ.
Source: wccftech.com
