Starlink සැටලයිට් අන්තර්ජාල සේවාව ශ්‍රී ලංකාව තුළ ආරම්භ කිරීම තාවකාලිකව අත්හිටුවා ඇත. මෙම තීරණයට හේතුව වී ඇත්තේ, රජයට අවශ්‍ය විටෙක මෙම සේවාව හරහා හුවමාරු වන දත්ත (data) පරීක්ෂා කිරීමට අවසර ලබාදීම පිළිබඳ Starlink සමාගමෙන් තවමත් සහතිකයක් ලැබී නොමැති වීමයි. ජාතික ආරක්ෂාව සහතික කිරීම සඳහා මෙම කොන්දේසිය ඉතා වැදගත් බව රජයේ නිලධාරීන් පවසයි.
2024 වසරේදී ශ්‍රී ලංකාවේ පැවති පෙර රජය විසින් Starlink සමාගමට මෙරට තුළ සේවාව ලබාදීමට අවසරයක් ලබා දී තිබුණි. එහෙත්, වත්මන් රජය එම තීරණය පිළිබඳ නැවත සලකා බලමින් සිටී. තාක්ෂණ හා ඩිජිටල් ආර්ථික කටයුතු රාජ්‍ය ඇමති එරංග වීරරත්න මහතා පවසන්නේ, "Starlink සේවාව හරහා නීතිවිරෝධී ක්‍රියාකාරකම් සිදු වුවහොත්, ඒ පිළිබඳ දත්ත ලබාගැනීමට අපට හැකියාව තිබිය යුතුය. එම සහතිකය ලැබෙන තුරු මෙම සේවාව ශ්‍රී ලංකාව තුළ ක්‍රියාත්මක කිරීමට අවසර හිමි නොවේ," යනුවෙනි.
ශ්‍රී ලංකා විදුලි සංදේශ නියාමන කොමිෂන් සභාව (TRCSL) විසින් මීට පෙර Starlink සේවාව සඳහා පැකේජ පහකට අනුමැතිය ලබා දී තිබුණි. මෙම පැකේජවල මිල ගණන් රුපියල් 9,200 සිට රුපියල් මිලියන 1.8 දක්වා විහිදෙයි. එහෙත්, දත්ත පරීක්ෂා කිරීමට අවසරයක් නොලැබීම හේතුවෙන්, මෙම සේවාව ක්‍රියාත්මක කිරීම තවදුරටත් ප්‍රමාද වී ඇත.
"කිසියම් පුද්ගලයෙක් හෝ කණ්ඩායමක් මෙම සේවාව යොදාගෙන නීති විරෝධී කටයුතුවල නිරත වුවහොත්, ඒ පිළිබඳ තොරතුරු ලබාගැනීමේ හැකියාව අපට තිබිය යුතුය. එසේ නොමැති නම්, එය ශ්‍රී ලංකාවේ ජාතික ආරක්ෂාවට තර්ජනයක් විය හැකිය," යනුවෙන් ඇමති වීරරත්න මහතා වැඩිදුරටත් ප්‍රකාශ කළේය. ඒ අනුව, Starlink සේවාව ශ්‍රී ලංකාවට ලබාදීම තවමත් අනිශ්චිත තත්ත්වයක පවතී.
Update: මාර්තු 25, 2025
මේ පුවත TRCSL වෙතින් ප්‍රතික්ෂේප කර තිබෙනවා.
Thimira Madusanka Thenuwara
