ලොව මේ වන විට මුහුණපා ඇති chip හිඟය හේතුවෙන් සමාගමේ වියදම් ඉහළ යා හැකි බවත්, එහි ප්‍රතිපලයක් ලෙස තම නිෂ්පාදන වල මිලද වැඩි කිරීමට සිදු විය හැකි බවත් ලොව තෙවනි විශාලම smartphone නිෂ්පාදකයා වන Xiaomi සමාගමේ සභාපති Wang Xiang පසුගිය 24දා ප්‍රකාශ කර තිබුණා.
"අප අනිවාර්යෙන් hardware devices උපරිම ඵලදායි ලෙස මිල කරන" බව ඔහු එහිදී කියා සිටියා.
"ඇත්තටම අප පාරිභෝගිකයින්ට දිය හැකි හොඳම මිල ලබා දීමට කටයුතු කරනවා. නමුත් ඇතැම්විට, මේ වියදම් ඉහල යාම පාරිභෝගිකයින්ටත් දැනෙන්න පිළිවන්", ඔහු තවදුරටත් සඳහන් කළා.
මේ වන විට ලොව පුරා පවතින chip හිඟය විවිධ කර්මාන්ත වලට දැන් දැනෙන්න පටන්ගෙන තිබෙනවා. Covid-19 වගේම චීන සමාගම් වලට එරෙහි සම්බාධකත්, ඉල්ලුමට සරිලන සැපයුම දීම සඳහා සුදානම් නොවීමත්, මේ හිඟය ඇතිවීමට බලපෑ බව විදෙස් වාර්තා සඳහන් කරනවා.
Xiaomi සමාගමේ ප්‍රධානම සැපයුම්කරුවෙකු වන Qualcomm සමාගමද මේ වන විට, ඉල්ලුමට සරිලන සැපයුමක් දීමට අපොහොසත් වී ඇති බව වාර්තාවනවා.
"යම් පීඩනයක් දැනුනත්, අපේ අනාගතය සුභදායි" යැයි, ආයෝජකයින් හමුවේ Wang Xiang අවසානයේ කියා සිටියා.
Source: Reuters
