මේ දින වල "Studio Ghibli-style" යන නම ලෝකය පුරා සමාජ මාධ්‍යවලත්, ලෝකයේත් දැවැන්ත කතාබහකට ලක්ව තිබෙනවා. මෙයට ප්‍රධාන හේතුව වන්නේ ChatGPT හි නවතම image generator තාක්ෂණය හරහා Ghibli විලාසිතාවේ සුන්දර ඇනිමේෂන් රූප නිර්මාණය වීමයි. මිනිසුන් තම එදිනෙදා ජීවිතයේ සිදුවීම් උදාහරණයක් ලෙස, උදෑසන තේ බීම හෝ ගමනක් යෑම, තම පවුලේ අය සමඟ ගත කල ෆොටෝස් මෙම AI මෙවලම භාවිතයෙන් Ghibli style නම් සුප්‍රසිද්ධ කලා විලාසිතාවට අනුව පරිවර්තනය කරනවා. මේ නිසා X, Instagram, Facebook සහ TikTok වැනි හැම Social media එකක්ම මේ Ghibli style රූපවලින් පිරී ගිහින් තිබෙනවා. නමුත් මේ ජනප්‍රියත්වය පිටුපස තවත් ගැඹුරු කතාවක් තිබෙනවා. Ghibli style කියන්නේ කුමක්ද? එය මෙතරම් ජනප්‍රිය වුණේ ඇයි? අපි ඒ ගැන තව ටිකක් විස්තර බලමු.
මොකක්ද මේ Ghibli style?
Studio Ghibli යනු ජපානයේ ටෝකියෝ වල Koganei ප්‍රදේශයේ පිහිටි, ලෝක ප්‍රකට animation studio එකක්. 1985 දී මෙය ආරම්භ කළේ ඇනිමේෂන් ශිල්පීන් සහ අධ්‍යක්ෂකවරුන් වන හයාඕ මියාසාකි (Hayao Miyazaki), ඉසාඕ ටකහටා (Isao Takahata), සහ නිෂ්පාදක ටෝෂියෝ සුසුකි (Toshio Suzuki) යන තිදෙනා විසිනි.
මේ Studio Ghibli ලෝකයට හඳුන්වා දුන් චිත්‍රපට අතර My Neighbor Totoro, Spirited Away, Kiki’s Delivery Service, Princess Mononoke, Howl’s Moving Castle, සහ Ponyo වැනි ඒවා ඇතුළත් වෙනවා. Spirited Away චිත්‍රපටය 2003 දී හොඳම ඇනිමේෂන් චිත්‍රපටයට හිමි ඔස්කාර් සම්මානය පවා දිනාගැනීමට හැකියාව ලැබුනා.
Studio Ghibli හි Animation style එක ලෝකය පුරා රසිකයන්ගේ හදවත් දිනාගෙන තිබෙන්නේ එහි අසමසම ගුණාත්මක භාවය සහ සුන්දරත්වය නිසායි. එහි චිත්‍රපටවල ඇති සියුම් විස්තර මිනිස් රූපවල හැඟීම් ප්‍රකාශනය, සොබාදහමේ ගැඹුරු සුන්දරත්වය සහ මෘදු පැස්ටල් වර්ණ පරාසයන් Ghibli style වලට ආවේණිකයි.
ඒ වගේම, Ghibli චිත්‍රපට බොහෝ විට පරිසර සංරක්ෂණය, මිනිස් ස්වභාවයේ සංකීර්ණතාව, සහ සාමය වැනි ගැඹුරු තේමාවන් ගෙන එනවා. "Princess Mononoke" වැනි චිත්‍රපටයක් මිනිසා සහ සොබාදහම අතර ගැටුම ගැඹුරින් විමසා බලනවා. මෙම ගැඹුරු අර්ථයන් සහ සුන්දර කලාව එකතු වීමෙන් Ghibli හි රූප ලෝකය පුරා ජනප්‍රිය වෙලා තිබෙනවා.
ChatGPT සහ Ghibli හි ජනප්‍රියත්වය
ChatGPT හි නවතම image generator මෙවලම, OpenAI හි DALL-E හි අලුත් ම අප්ඩේට් එක, මේ දවස් වල Ghibli style ෆොටෝස් නිර්මාණය කිරීමට භාවිතා වුණා. මිනිසුන් තම ඡායාරූප ChatGPT එකට අප්ලෝඩ් කරලා, ඒවා Ghibli style එකට පරිවර්තනය කර ගන්නවා.
මෙම තාක්ෂණය Ghibli හි රසිකයන්ට පමණක් නොව, කිසිදා Animation චිත්‍රපටයක් නොබැලූ අයටත් තමන්ගේම Ghibli style ලෝකයක් නිර්මාණය කර ගැනීමට ඉඩ ලබා දී තිබෙනවා. තමන්ගේම ඡායාරූපයක් මෙම style එකට අනුව ගොඩනැංවීමට හැකි වීම නිසා එයට ලැබෙන ආකර්ශණය වැඩි වීම, මෙහි ජනප්‍රියතාවයට බොහෝ සෙයින් හේතු වී තිබෙනවා. ශ්‍රී ලංකාවේ පමණක් නොව ලෝකය පුරාම සිටින ජනප්‍රිය පුද්ගලයින් තමන්ගේම ආවේණික Ghibli Style ෆොටෝස් ඔවුන්ගේ සමාජජාලා හරහා බෙදා ගැනීමත් මෙහි එකවර ඇති වූ ජනප්‍රියතාවයට තවත් හේතුවක්.
කෙසේ නමුත්, මෙම තාක්ෂණය භාවිතය Ghibli හි මුල් ශිල්පීය ක්‍රමවලට ගරු කිරීමක් ද, නැතිනම් උපහාසයක් ද යන්න ගැනත් සංවාදයක් Social media වලම ඇති වෙලා තිබෙනවා.
හයාඕ මියාසාකිගේ අදහස්
Studio Ghibli හි ප්‍රධාන ශිල්පියා වන හයාඕ මියාසාකි AI තාක්ෂණය ගැන දරණ මතය ඉතාමත් විවේචනාත්මකයි. එක් අවස්තාවකදී ඔහු AI යන්ත්‍රයකින් ඇනිමේෂන් නිර්මාණය ගැන යෝජනාවකට ප්‍රතිචාර දක්වමින් : "මම මේකට ඉතාමත් පිළිකුල් කරනවා. මේක ජීවිතයටම අපහාසයක්." යනුවෙන් පවසා තිබෙනවා. ඔහුගේ මතය වන්නේ ඇනිමේෂන් යනු මිනිස් ශ්‍රමයෙන් සහ හදවතින් නිර්මාණය විය යුතු බවයි. Studio Ghibli හි චිත්‍රපට බොහෝ විට අතින් ඇඳීමෙන් සහ කැපවීමෙන් සාදන ලද්දක් බැවින්, AI හරහා ඒවා ප්‍රතිනිර්මාණය කිරීම ඔහුට අපහාසයක් ලෙස පෙනෙනවා විය හැක. එපමණක් නොව අවුරුදු ගණනාවක් කැප වී මෙලස ගොඩනැංවූ Ghibli කලාව, එක් තත්පරයක් තුලදී AI විසින් ඩැහැ ගැනීම නිසා එවාගේ ප්‍රකාශන හිමිකම් කඩනවාද යන්නත් සමාජය තුල කතා බහ වන තවත් දෙයක්.
මෙම ප්‍රවණතාවය ගැන ධනාත්මක සහ ඍණාත්මක යන දෙවර්ගයේම ප්‍රතිචාර ලැබෙනවා.
Studio Ghibli යනු ඇනිමේෂන් ලෝකයේ පතාක යෝධයෙක්. එහි සුන්දර කලාව සහ ගැඹුරු කතා, ලෝකය පුරා රසිකයන්ගේ හදවත් දිනාගෙන තිබෙනවා. AI හරහා ඇති වූ මෙම ප්‍රවණතාවය Ghibli හි රසික පිරිස වඩාත් පුළුල් කළත්, එය Ghibli හි මුල් ශිල්පීය උරුමයට ගැළපෙනවාද යන්න ගැන ප්‍රශ්න තිබෙනවා. හයාඕ මියාසාකි වැනි ශිල්පීන්ට මෙය තම කලාවට තර්ජනයක් ලෙස පෙනුණත්, නව පරම්පරාවේ රසිකයන්ට එය Ghibli හි මැජික් ලෝකයට ඇතුළු වීමේ නව මාවතක්. Ghibli කලා රටාව ලෝකය පුරා ජනප්‍රිය වන්නේ එහි සුන්දරත්වය සහ ගැඹුර නිසාමයි. කෙසේ නමුත් එය AI හරහා ග්‍රහණය කළ හැකිද යන්න තවමත් විවාදයට තුඩු දෙනවා.
